លោក ស ខេង សុំការយោគយល់ពីសាធារណជនចំពោះការប៉ះពាល់ចរាចរ
លោក ស ខេង រដ្ឋមន្ត្រីក្រសួងមហាផ្ទៃបានសុំអធ្យាស្រ័យចំពោះសាធារណជននូវការរំខាននិងការប៉ះពាល់ចរាចរណ៍ក្នុងពេលមានការរៀបពិធីរៀបអាពាហ៍ពិពាហ៍កូនរបស់លោកកាលពីចុងសប្តាហ៍មុន ក្នុងក្រុងភ្នំពេញ។
នៅក្នុងលិខិតចេញកាលពីម្សិលមិញ ខុទ្ទកាល័យលោក ស ខេង បានសរសេរថា "សមត្ថកិច្ចពាក់ព័ន្ធក៏បានខិតខំប្រឹងប្រែងយកចិត្តទុកដាក់រៀបចំសណ្តាប់ធ្នាប់សាធារណៈ និងការរក្សារំហូរជាប្រក្រតីនៃចរាចរណ៍ ដោយពុំតម្រូវឲ្យមានការបិទកំណាត់មហាវិថីព្រះនរោត្តម និងកំណាត់ផ្លូវ២៤០នោះឡើយ។ ប៉ុន្តែទោះបីជាយ៉ាងនេះក្តី សម្តេចក្រឡាហោម ស ខេង សូមអភ័យទោសចំពោះសាធារណជននូវរាល់ការរំខាន ឬការប៉ះពាល់ដោយអចេតនា ដែលអាចកើតមានក្នុងអំឡុងពេលនៃការប្រារព្ធពិធីខាងលើនេះ"។
៥នាក់ស្លាប់ក្នុងគ្រោះថ្នាក់ចរាចរណ៏រថយន្តបុកគ្នា
នគរបាលខេត្តពោធិ៍សាត់បាននិយាយថ្ងៃនេះថា មានមនុស្ស៤នាក់បានស្លាប់ និង៩នាក់ផ្សេងទៀតរងរបួស នៅពេលដែលរថយន្តដឹកសីុទែនសាំងមួយគ្រឿងបុកចំពីមុខរថយន្តទួរីសដែលដឹកអ្នកដំណើរនៅម៉ោង៦ព្រឹកមិញនេះនៅតាមផ្លូវជាតិលេខ៥ ក្នុងឃុំអន្សាចំបក់ ស្រុកក្រគរ។
លោក ឯម រុន អធិការស្រុកក្រគរ បាននិយាយថា មានរថយន្តដឹកសាំងមួយគ្រឿងបើកបរពីខេត្តបាត់ដំបងឆ្ពោះមកក្រុងភ្នំពេញបានបុកចំពីមុខរថយន្តទួរីសដែលបើកពីខេត្តកំពង់ឆ្នាំងឆ្ពោះទៅខេត្តសៀមរាបនៅម៉ោងប្រហែល៦:១០នាទីព្រឹក ដោយបណ្តាលឲ្យមនុស្ស៤នាក់ស្លាប់ និង៩នាក់រងរបួស។
លោក ឯម រុន បាននិយាយថា "ឡានដឹកសាំងជាអ្នកបង្កហេតុ ហើយតៃកុងបានរត់បាត់"។
លោក ឈឹម សារុន ប្រធានការិយាល័យចរាចរណ៍ខេត្តកំពង់ឆ្នាំងដែលបានចូលរួមដឹកជនរងគ្រោះមកមន្ទីរពេទ្យខេត្តកំពង់ឆ្នាំង បាននិយាយថា អ្នកបើកបររថយន្តទួរីសបានស្លាប់ក្នុងមន្ទីរពេទ្យនៅថ្ងៃនេះដែលធ្វើឲ្យចំនួនអ្នកស្លាប់កើនដល់៥នាក់។
យោងតាមរបាយការណ៍អគ្គស្នងការនគរបាលជាតិឲ្យដឹងថា ក្នុងឆ្នាំ២០១៥ មានមនុស្សរងគ្រោះដោយគ្រោះថ្នាក់ចរាចរណ៍ចំនួនសរុប ៩.៧៧៥នាក់ ក្នុងនោះបណ្តាលឲ្យស្លាប់ចំនួន២.២៦៥នាក់ និងរងរបួសចំនួន៧.៥១០នាក់៕
សមត្ថកិច្ចបាញ់ស្លាប់ជនសង្ស័យប្លន់ម៉ូតូពីរនាក់
មន្ត្រីនិយាយថ្ងៃនេះថា កម្លាំងបើកប្រតិបត្តិការបង្ក្រាបក្រុមសង្ស័យប្លន់មូតូមួយក្រុមក្នុងខណ្ឌព្រែកព្នៅដោយជនសង្ស័យត្រូវបាញ់ស្លាប់ដោយសារតែបាញ់តដៃជាមួយសមត្ថកិច្ច។
លោក រ័ត្ន ស៊្រាង មេបញ្ជាការកងរាជអាវុធហត្ថក្រុងភ្នំពេញ បានមានប្រសាសន៍ថា កម្លាំងរបស់លោកបានដេញតាមក្រុមចោរប្លន់មួយក្រុម ក្រោយពីពួកគេបានបាញ់សម្លាប់ជនរងគ្រោះម្នាក់ឈ្មោះឌិន ដារិទ្ធ អាយុ២១ឆ្នាំ ក្នុងខណ្ឌទួលគោកនៅម៉ោង៥និង២០នាទីព្រឹកថ្ងៃនេះ ហើយបានយកម៉ូតូទៅបាត់។
ឧត្តមសេនីយ៍ទោ រ័ត្ន ស៊្រាង បាននិយាយថា កម្លាំងរបស់លោកបានដេញតាម ហើយចាប់បានជនសង្ស័យពីរនាក់ក្នុងខណ្ឌឫស្សីកែវ ហើយដែលឈានដល់ការចាប់ខ្លួនស្ត្រីពីរនាក់ទៀត នៅក្នុងខណ្ឌព្រែកព្នៅ ក្នុងនោះមានស្ត្រីម្នាក់មានកាំភ្លើងខ្លីមួយដើមនៅក្នុងកាបូប។
សាលាឧទ្ធរណ៍ថ្ងៃនេះបានបដិសេធមិនទទួលយកពាក្យបណ្តឹងទាស់នឹងការឲ្យមានការស៊ើបអង្កេតឡើងវិញរបស់តុលាការក្រុងភ្នំពេញ ដែលប្តឹងដោយមេធាវីលោក ហុង សុខហួរ សមាជិកព្រឹទ្ធសភាគណបក្សប្រឆាំងដែលរងការចោទប្រកាន់ពីបទក្លែងឯកសារសាធារណៈ និងញុះញង់។
ក្រោយពីបើកសវនាការប្រហែល២០នាទី លោក ប្លង់ សំណាង ប្រធានចៅក្រមជំនុំជម្រះសាលាឧទ្ធរណ៍ បានប្រកាសថា "ពាក្យបណ្តឹងរបស់មេធាវី ហុង សុខហួរ កាលពីថ្ងៃទី២១ ខែតុលា ឆ្នាំ២០១៥ ធ្វើខុសពីទម្រង់ច្បាប់ ដែលមិនអាចទទួលយកបានទេ"។
ប៉ូលិសនិយាយថា មានកម្មករកាត់ដេរ៣នាក់បានរងរបួសធ្ងន់ និង៥២នាក់ផ្សេងទៀតរបួសស្រាលក្នុងគ្រោះថ្នាក់ចរាចរណ៍ក្រឡាប់ឡានកាលពីល្ងាចម្សិលមិញនៅលើកំណាត់ផ្លូវលេខ៥ក្នុងស្រុកកំពង់ត្រឡាច ខេត្តកំពង់ឆ្នាំង។
លោក មាស ស៊ីភិន អធិការស្តីទីស្រុកកំពង់ត្រឡាច និយាយថ្ងៃនេះថាឡានមួយគ្រឿងដែលដឹកកម្មកររោងចក្រប្រហែល ៦០នាក់បានក្រឡាប់ ហើយធ្លាក់ចូលក្នុងត្រពាំងទឹកពីមុខវត្តតាក្តុលក្នុងភូមិតាក្តុល ឃុំពានី ស្រុកកំពង់ត្រឡាចកាលពីម៉ោង៦កន្លះល្ងាចម្សិលមិញ ក្នុងពេលដែលអ្នកបើកបរព្យាយាមគេចចេញពីម៉ូតូមួយគ្រឿងដែលកំពុងបើកកាត់ផ្លូវ។
លោក ស៊ីភិន បាននិយាយថា "ឡានដឹកកម្មករបានក្រឡាប់ ព្រោះកំពុងតែបើកបរ ស្រាប់តែមានម៉ូតូបើកកាត់ផ្លូវ ហើយអ្នកបើកឡានក៏បួងចង្កូតធ្លាក់ផ្លូវតែម្តង"។
មន្ត្រីនិយាយថា អ្នករបួសធ្ងន់៣នាក់ ដែលរួមមានបុរសម្នាក់ កំពុងទទួលការព្យាបាលនៅឯមន្ទីរពេទ្យកាល់ម៉ែត ចំណែកឯ៥២នាក់ផ្សេងទៀតទទួលការព្យាបាលនៅមន្ទីរពេទ្យខេត្តកំពង់ឆ្នាំង។
លោក ស៊ីភិន បាននិយាយថា "ឥឡូវយើងកំពុងតាមរកអ្នកបើកបរនៅឡើយ ហើយគាត់រត់គេចខ្លួនក្រោយពីឡានជួបគ្រោះថ្នាក់"។
លោក ឈឹម សារុន ប្រធានការិយាល័យចរាចរណ៍ខេត្ត បាននិយាយថា យ៉ាងហោចណាស់ក៏មានអ្នកបើកបររថយន្តប្រហែល៥០ភាគរយមិនមានប័ណ្ណបើកបរទេ។
លោក សារុន បាននិយាយថា "អ្នកបើកបរច្រើនតែបើកធ្វេសប្រហែស បើកជែងគ្នា និងអត់សណ្តាប់ធ្នាប់"។
លោកប្រធានការិយាល័យចរាចរណ៍ខេត្តរូបនេះបាននិយាយថា ចាប់ពីខែមករា ឆ្នាំក្រោយនឹងមានការអនុវត្តច្បាប់ចរាចរណ៍តឹងរឹង ដោយចាត់វិធានការចំពោះអ្នកបើកបររថយន្តដែលគ្មានប័ណ្ណបើកបរ៕
លោក ហ៊ុន សែន ប្រាប់ឲ្យបង ប្អូនខ្មែរអុិស្លាមប្រុងប្រយ័ត្ន ចំពោះការផ្លាស់ប្ដូររដ្ឋាភិបាល
លោកនាយករដ្ឋមន្ត្រី ហ៊ុន សែន បានឆ្លៀតឱកាសក្នុងពិធីបុណ្យចូលឆ្នាំថ្មីប្រពៃណីសាសនាអុិស្លាមកាលពីម្សិលមិញ ដើម្បីក្រើនរំឭកសាសនិកខ្មែរអុិស្លាមនៅក្នុងប្រទេសថា ការផ្លាស់ប្ដូររដ្ឋាភិបាលអាចឈានទៅរកការកាប់សម្លាប់យ៉ាងរាលដាល និងការធ្វើទុក្ខបុកម្នេញចំពោះសាសនិកអុិស្លាមដូចក្រោមរបបខ្មែរក្រហមក្នុងទសវត្សរ៍ឆ្នាំ១៩៧០។
អំឡុងសុន្ទរកថាលើកទី២របស់លោកកាលពីពេលថ្មីៗនេះដែលហាក់ដូចជាប្រៀបធៀបគណបក្សសង្គ្រោះជាតិទៅនឹងខ្មែរក្រហម លោក ហ៊ុន សែន បានលើកឡើងតាមរយៈសារបង្ហោះលើទំព័រហ្វេសប៊ុកផ្ទាល់ខ្លួនថា រដ្ឋាភិបាលរបស់លោកជាអ្នកដែលបានសង្គ្រោះសាសនិកអុុិស្លាមនៅក្នុងប្រទេស ចំណែកឯគណបក្សនយោបាយមួយដែលមិនបញ្ចេញឈ្មោះ...
ជនភៀសខ្លួនរ៉ូហុីងយ៉ាទំនងជា ត្រឡប់ទៅប្រទេសភូមាវិញហើយ
យោងតាមក្រសួងមហាផ្ទៃបានឲ្យដឹងថា ជនភៀសខ្លួនរ៉ូហ៊ីងយ៉ាម្នាក់ ដែលបានមកដល់ក្រុងភ្នំពេញកាលពីខែមិថុនា ជាផ្នែកមួយនៃកិច្ចព្រមព្រៀងដ៏ចម្រូងចម្រាសជាមួយប្រទេសអូស្ត្រាលី ទំនងជានឹងត្រឡប់ទៅប្រទេសភូមាវិញហើយ បន្ទាប់ពីស្នើសុំទៅស្រុកវិញ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ថា បុរសរ៉ូហ៊ីងយ៉ា ដែលយោងតាមរដ្ឋាភិបាលឲ្យដឹងថា បានស្នើសុំវិលត្រឡប់ទៅប្រទេសកំណើតរបស់ខ្លួនវិញ...
តុលាការក្រុងភ្នំពេញនៅថ្ងៃនេះបានបញ្ជាឲ្យមានការស៊ើបអង្កេតស្រាវជ្រាវឡើងវិញចំពោះវីដេអូឃ្លីប ដែលបង្ហោះលើហ្វេសប៊ុករបស់លោក ហុង សុខហួរ សមាជិកព្រឹទ្ធសភាគណបក្សប្រឆាំងដែលរងការចោទប្រកាន់ពីបទក្លែងឯកសារសាធារណៈ និងញុះញង់។
ក្រោយពីបើកសវនាការជំនុំជម្រះប្រហែល៣០នាទីនៅរសៀលនេះ ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ បានប្រកាសថា "ប្រគល់ការស៊ើបអង្កេតទៅចៅក្រមតុលាការរាជធានីភ្នំពេញ។ សម្រេចឲ្យភាគីជនជាប់ចោទដាក់កាលបរិច្ឆេទឲ្យបានច្បាស់អំពីឯកសារដែលដកចេញពីអ៊ិនធឺណិត និងសូមបញ្ជាក់ពីលេខម៉ាស៊ីន និងសម្ភារដល់តុលាការ"។
លោក ជួង ជូងី មេធាវីរបស់លោក សុខហួរ បានជំទាស់នឹងការចាត់របេៀបនេះ ដោយនិយាយថា តុលាការគួរតែបន្តសវនាការ។
រដ្ឋាភិបាលបារាំងបានប្រគល់ផែនទីព្រំដែនកម្ពុជា-វៀតណាម ឲ្យរដ្ឋាភិបាលខ្ចីកាលពីម្សិលមិញ ដោយលោក ហោ ណាំហុង រដ្ឋមន្ត្រីក្រសួងការបរទេសបានមានប្រសាសន៍ថាមិនមានភាពខុសគ្នារវាងផែនទីដែលផ្តល់ដោយបារាំងនិងផែនទីរបស់រដ្ឋាភិបាលទេ។
លោក ណាំហុង បានមានប្រសាសន៍ថា "អំបាញ់មិញនេះ ឯកឧត្តម វ៉ា គឹមហុង ក៏បានផ្ទៀងផ្ទាត់ឃើញថា អត់ខុសគ្នាទេព្រំដែន។ េហតុអ្វីក៏វាមិនខុសគ្នា? ដោយសារយើងប្រើប្រាស់រាប់ទសវត្សរ៍ តាំងពីឆ្នាំ១៩៨៥ ពេលចុះសន្ធិសញ្ញាជាមួយវៀតណាម ដើម្បីកំណត់ព្រំដែន។"
លោក ណាំហុង បានមានប្រសាសន៍បន្តថា "ក៏ប៉ុន្តែសុំជម្រាបថា ទោះបីជាយើងយកផែនទីបោនខ្នាត១លើ១០០.០០០ទៅប្រើជាមួយវៀតណាមក្តី ទីមួយផ្អែកទាំងស្រុង ក៏ប៉ុន្តែកន្លែងណាដែលឃើញថា ខាតដល់កម្ពុជាយើង យើងក៏អត់យកដែរ។ យើងយកការកាន់កាប់ជាក់ស្តែងរបស់ប្រជាជនយើង។"
លោក ហ៊ុន សែន៖ មានការអី និយាយគ្នា កុំបាច់ជេរគ្នាបញ្ចោរគ្នា
លោកនាយករដ្ឋមន្ត្រី ហ៊ុន សែន បានអំពាវនាវឲ្យមានការអនុវត្តខ្ជាប់ខ្ជួននូវវប្បធម៌សន្ទនាដែលលោក និងលោក សម រង្ស៊ី មេដឹកនាំបក្សប្រឆាំង បានបង្កើតឡើង។
ថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប នៅវិទ្យាស្ថានជាតិអប់រំក្នុងក្រុងភ្នំពេញថ្ងៃនេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា" វប្បធម៌សន្ទនាត្រូវជំនួសឲ្យវប្បធម៌ប្រទូសរ៉ាយ វប្បធម៌អរិភាព វប្បធម៌ហិង្សា។ មានការអីនិយាយគ្នា។ កុំបាច់ជេរបញ្ចោរគ្នា កុំបាច់ប្រមាថគ្នា កុំបាច់ញុះញង់ តែនិយាយគ្នាទៅ វាជាប្រភេទប្រជាធិបតេយ្យមួយបែប។
កាលពីថ្ងៃសុក្រ គណបក្សប្រជាជនកម្ពុជា និងគណបក្សសង្គ្រោះជាតិ បានយល់ព្រមអនុវត្តតាមក្រមប្រតិបត្តិ ដែលសមាជិកបក្សត្រូវនិយាយជាសាធារណៈស្ថិតក្រោមវប្បធម៌សន្ទនា។
ចំណុចនៅក្នុងសេចក្តីថ្លែងការណ៍រួមដែលត្រូវចៀសវាង រួមមានសម្តីមួយចំនួនដែលប្រើដោយគណបក្សទាំងពីរ ដោយគណបក្សសង្គ្រោះជាតិមិនត្រូវប្រើពាក្យជេរប្រមាថទៅលើគណបក្សប្រជាជនកម្ពុជា ហើយគណបក្សប្រជាជនកម្ពុជាក៏មិនត្រូវប្រើពាក្យគំរាមកំហែងដូចជាការចាប់ដាក់គុក ឬសង្គ្រាមនឹងកើតឡើង៕